रामदासी सांप्रदायिक कागदपत्रे खंड-१ मध्ये उंब्रज मठाची कागदपत्रे प्रसिद्ध करण्यात आली आहेत. त्यांपैकी अनेक पत्रांमध्ये ‘श्रीकल्याणस्वामींचे शिष्य श्रीकेशवस्वामी’ अशा आशयाचे उल्लेख आहेत. श्रीकेशवस्वामींची त्यांचे सद्गुरू योगिराज श्रीकल्याणस्वामींचे ठायी अनन्य भक्ती होती. श्रीकेशवस्वामींनी श्रीसमर्थ रामदास स्वामी आणि योगिराज श्रीकल्याणस्वामी यांच्या अस्थींचे एकत्रित विसर्जन केले. तो प्रसंग मोठा विलक्षण आहे. 

श्रीकेशवस्वामी प्रतिवर्षी गुरुपौर्णिमेला डोमगाव येथे सद्गुरू श्रीकल्याणस्वामींच्या दर्शनासाठी येत असत. त्यावेळी सद्गुरू समर्थांच्या अस्थीविसर्जनाविषयी ते श्रीकल्याणस्वामींकडे प्रार्थना करत असत. परंतु श्रीकल्याणस्वामींकडून याबाबत त्यांना आज्ञा होत नसे. हा क्रम सन १६८२ ते सन १७१३ असा तीस वर्षांहून अधिक काळ चालला. परंतु सन १७१४मध्ये एक अद्भूत प्रसंग घडला. त्यावर्षी आषाढ महिना हा अधिक मास होता. या आषाढ पौर्णिमेला अर्थात गुरुपौर्णिमेकरता डोमगावला जाताना चाफळ येथील वृंदावनातून श्रीसमर्थांच्या अस्थी घेऊन जावे आणि तिथून पुढे श्रीक्षेत्र काशीमध्ये अस्थी विसर्जन करावे, असे श्रीकेशवस्वामींनी ठरवले. त्यानुसार अधिक आषाढ शुद्ध त्रयोदशी शके सोळाशे छत्तीस, (सन १७१४) रोजी श्रीकेशवस्वामींनी चाफळ येथील वृंदावनातून अस्थी काढल्या. त्यावेळी इकडे परंडा मठामध्ये योगिराज श्रीकल्याणस्वामी रामकथा सांगत होते. साक्षात श्रीकल्याणस्वामींच्या मुखातून रामकथा ऐकण्यासाठी परंड्यामध्ये साधूसंतांची मांदियाळी जमली होती.  आषाढ शुद्ध त्रयोदशीला रामकथा संपूर्ण झाली. आणि अद्भूत घडले. ज्या क्षणी श्रीकेशवस्वामींनी चाफळच्या वृंदावनातून अस्थी बाहेर काढल्या, त्याच क्षणी आपली सद्गुरू माउली अंतिम प्रवासाला निघाली आहे, हे योगिराज श्रीकल्याणस्वामींनी अंतर्ज्ञानाने जाणले. त्याच क्षणी योगिराज श्रीकल्याणस्वामी योगमार्गाचा अवलंब करून समर्थचरणी विलीन झाले. श्रीकल्याणस्वामी समाधिस्थ झाले. त्यानंतर डोमगाव येथे त्यांच्या पार्थिवावर अंत्यसंस्कार करण्यात आले. गुरुपौर्णिमेच्या दिवशी श्रीकेशवस्वामी डोमगावला पोहोचले. तिथे त्यांना ही वार्ता कळाली. श्रीकेशवस्वामी पोहोचले त्यादिवशी श्रीकल्याणस्वामींच्या अस्थी एकत्र करण्यात आल्या होत्या. हे दृश्य पाहून ते कळवळले. त्यांनी शोक केला. सद्गुरूभक्त महात्म्याची अगम्य लीला पाहून ते विस्मित झाले. सर्व विधी यथासांग पूर्ण केल्यानंतर श्रीसमर्थ आणि श्रीकल्याणस्वामी यांच्या अस्थी घेऊन श्रीकेशवस्वामी श्रीक्षेत्र काशीला गेले. श्रीकेशवस्वामींच्या हस्ते दोघांच्याही अस्थींचे एकत्र विसर्जन झाले. या प्रसंगाविषयी दासविश्रामधामकार श्रीआत्माराम स्वामी म्हणतात,